الى حبيبتى الكنانة ســـاعة الخــطـــر(شعر)

الى حبيبتى الكنانة
ســـاعة الخــطـــر ....شعربقلم //أحمد عفيفي
***************

متبعتره قطوفك

مهزوزه من خوفك

الوهم قصّر مداكى

عرّاكى

لحظــــة برق

بعافر/

ابلع ف ريقى

لاجل

ما يطرى الكلام

ف الحلق

بصرُخ

بقول: ياجـــــاى

رسونى/

ع اللى جــــاى

****

هبو العطب

شرنق على عينى

انكفيت

وانا لسه بمسح

دمعه من جفنى

سيرة الخوف بترجفنى

دق القلوب/

مش حنين

مادام الخوف

والقلق صاحيين!!

شدينى من خوفى

وبلاش

حدوته منعاده

شطّ البراح يندهك

تنسى.. كما العاده!!

*******

واقفه كما الاغراب

لا طمنتى الستاير

ولا التراب اتنفض

حلمى ارتبط بنشيد

ولحظة ظفر

انا طير وواخد

ع الخطر

لونك بشوفه

مش بلون

كل البشر

لون الحقيقه

حين/

م تجرحها الظنون

***

{ايه اللى بينّا

مهول

مهوش منسجم؟}

موات

بيخرج م الحياه

وحياه

بتخرج م العدم

ضفّرت

من نسج الشكايا

سجادة بُكا

ومن دموع الاخيله

بنسج حياه

****

كان نفسى

اضُمك ف الشتا

واغسل شوارعك

م الحـــــواه

وانعى معاكى

صبرنا !!



لو تسمحى؟

م بتسمحيش

مش ده المهم

مهم انا

احفظ فروضك

جوه روحى

لحين

م يشتدّ الخطر!!
[وحدهم المشرفون لديهم صلاحيات معاينة هذا الرابط]