على كل الشطوط (شعر صلاح شعبان الولي)

على كل الشطوط
وعلى كل الشوارع
وعلى كل البيوت
رسمتك حبيبى
ولما تغيب عن عينى لحظة
تموت الضحكة فى عيوني
وحاجات كتير ف قلبي تموت
ولما خيالك الهادى يفوت
تغنى الدنيا
وكل احزاني تموت
*********
منين
منين الكلام الطيب ييجى
واحنا زى م احنا
ضميرنا مات
الخوف من ربنا
جوانا مات
وياريت يكون
نصيبنا السكات
منين نجيب الكلام الطيب
ومنين يكون البعيد عنا قريب
ومنين يجينا الآمان
واحنا زى م احنا
عمرنا م اتعلمنا من جراحنا
****
قلمى الرصاص
والدى قال لى
والفرح مالي عنيه
ياسلام على النعيم
اللى انتو فيه
لما شافنى باكتب
بالقلم الرصاص
كل ما باكتب
هو بيصغر
وانا باكبر واكبر
وبيصبح لي اساس
**********

صلاح شعبان